Сустрэча з паэтэсай В.Бокуць
22.02.2018
У сераду, 21 лютага, у міжнародны дзень роднай мовы, з мэтай фарміравання любові да беларускай мовы, далучэння дзяцей да нацыянальных традыцый і творчасці беларускіх паэтаў у Уздзенскім яслях садку №3 прайшла літаратурна-музычная гасцёўня “Беларускія пісьменнікі –дзецям”. Удзел у мерапрыемстве, якое падрыхтавалі музычны кіраўнік установы Пархута А.А., выхавацелі Пуцэйка А.М., Цішчанка А.В., Байдакова К.Г., прынялі выхаванцы сярэдніх і старэйшых груп ўстановы.
Лейтматывам мерапрыемства стала тэма зімы ў творчасці беларускіх паэтаў. Да дзяцей у госці прыйшла Чараўніца-Зіма, ролю якой выканала матуля выхаванца Уладзіка Кучука. Выхаванцы сярэдніх груп дзіцячага садка Ганна Траяноўская, Валерыя Шмакава, Мар’яна Галсцян, Леў Жэлаўскі пазнаёмілі прысутных гасцей з творамі беларускіх паэтаў Н. Галіноўскай, Я. Коласа, А. Дзеружыскага, І. Васілеўскага, П. Броўкі, П. Глебкі. Дзеці вельмі прыгожа і дасканала, улічваючы ўсе асаблівасці беларускага маўлення, дэкламавалі беларускія вершы “Размова сняжынак”, “Надыход зімы”, “Сняжынкі”, “Снегапад”, “Зіма”,прысвечаныя зімовай тэматыцы. З задавальненнем выконвалі дзеці беларускія песні “Белы снег”, “Ой, зіма, зіма, зіма”, прымалі ўдзел у нацыянальных беларускіх гульнях “Верабейка”, “Падушачка”.
Асаблівае ўражанне ад мерапрыемства пакінула сустрэча выхаванцаў ясляў-сада з уздзенскай паэтэсай Вольгай Рыгораўнай Бокуць. Яна расказала дзецям пра тое як нараджаюцца вершы і прачытала ўласныя творы на беларускай мове, выканала разам з дзецьмі песню “Смоўжык”, якую напісала сама. У сваю чаргу, дзеці падаравалі паэтэсе альбом малюнкаў, якія яны зрабілі па прачытаных вершах Вольгі Рыгораўны.
Сустрэча аказалася вельмі цёплай, цікавай і змястоўнай. Дзеці яшчэ доўгі час знаходзіліся пад уражаннем ад мерапрыемства. Такія формы работы з выхаванцамі дапамагаюць выхоўваць цікавасць да роднай мовы, успрымаць яе мілагучнасць і прыгажосць, далучаць дзяцей да нацыянальнай беларускай культуры.
Больш фотаздымкаў з мерапрыемства можна паглядзець ТУТ